Belgian nat’l. namun-og og humabdos priso

CEBU, Philippines -  Gidakop sa kapulisan ang Belgian national tungod sa pagpanagmal og menor de edad nga anak sa iyang asawa  didto sa barangay Pandakan sa lungsod sa Pinamungajan niadtong Martes sa alas 4:30 sa hapon.

Ang biktima mao si Ryan Navarro,16, nagpuyo sa maong lugar  ug anak ni Perla Navarro, hingkod, nga asawa sa langyaw. Samtang ang suspek mao  si Mario Morale Vergelyn, hingkod ug  Belgian national apan kasamtangang nagpuyo sa maong lugar.  Si PO1 April Lobiano sa Women’s Desk sa Pinamungajan Police  Station mibutyag  sa Banat News  nga sayo  niini  ang  suspek ug ang asawa niini naglalis nga misangpot sa away.

Apan ang biktima nga nakakita misuway   og  laban sa iyang inahan   hinungdan  nga  gisugat og  kumo sa suspek ug gidapatan. Ang mga silingan maoy mireport sa kapolisan hinungdan  nga gisikop sa  mga otoridad  ang maong langyaw.

Gibalhug  dayon  kini  sa prisohan  samtang gipaabot pa sa  kapolisan nga mosang-at og kaso ang asawa niini. Nasuta  usab sa  mga  otoridad  nga expired na ang VISA sa maong langyaw niadtong  Hunyo 14, 2013 pa. (BANAT NEWS)