Asawa nakuhaa’g 8 ka paketeng shabu priso

CEBU, Philippines - Nadakpan sa kapolisan ang usa ka asawa kinsa  nasakmitan  og  walo ka paketeng  shabu samtang ang  iyang  bana  nga  miikyas  nagbilin  og  bag  nga  gisudlan sa  dul-ang usa ka  kilo nga pinaugang dahon sa marijuana sa barangay Lawaan, dakbayan sa Danao sa miaging  hapon.

Giila  sa kapolisan  ang  nadakpan   nga mao si  Emee Octores, 27, walay trabaho, samtang  ang  iyang  bana  nga  si  Nelson Octores, hingkod, maoy  gipangita  pa sa kapolisan.

Si SPO2  Ildefonso  Prosia sa kapolisan sa maong dakbayan nga nahinabi sa Banat News miingon nga nakadawat og taho ang ilang buhatan nga ang barangay  Lawaan  usa sa mga barangay   sa bukid  sa Danao nga naghitak ang illegal nga drugas.

Dugang pa niya nga gumikan sa maong  taho gimando sa ilang hepe  ang  paglusad  og  saturation  drive   batok  sa tanang illegal nga kalihokan sa maong  mga  lugar.

Matud pa ni SPO2 Prosia nga ang team ni PO2 Jomar Solomon maoy nangulo sa  pagpangronda    ug ilang  girombo ang  barangay Lawaan ug sa ilang  pagsaka  ngadto ilang nasugatan ang  magtiayon nga katahapan kaayo ang lihok nga naglakaw  hinungdan nga ila  kining  gipahunong.

Si SPO2 Prosia miingon nga  ang bana nga nakamatikod nga polis ang ilang gikasugat dali  nga  milabay  sa iyang knapsack ug  mikaratil og dagan.

Samtang  ang asawa nga nakalitan  wala makalihok ug  nagunitan  sa  mga  polis  ug  gideretso  og  sikop. Dugang pa ni SPO2 Prosia nga dihang girikisa sa kapolisan ang bag ni Emee  nakuha ang walo ka pakete nga gituohang shabu .

Ang knapsack nga gilabay sa bana  nakuha ang dul-an sa usa ka kilong pinaugang dahon sa marijuana.

Ang kasong kalapasan sa Republic Act 9165 kon Comprehensive Dangerous Drug Act of 2002 maoy gipasaka  batok sa magtiayon  ug nagtingkagol  na  sa prisohan  ang  asawa samtang  gipangita  pa  sa kapolisan  ang  bana. (BANAT NEWS)