Midwives sa Badian gikasohan
CEBU, Philippines - Gipasakaan na og reklamo diha sa Office of the Ombudsman ang duha ka midwives sa birthing center sa Badian may labot sa giingong pagbalibad nila sa manganakay nga ginang nga nakaanak na hinuon sa traysikad ug nahagbong ang puya sa dalan nga nakaingon sa kamatayon niini.
Ang magtiayong Benjamin Javierto ug ang asawa niini nga si Regina, residente sa Sitio Campagong, Poblacion, Badian misang-at og kaso batok nila ni Luzviminda Bruce ug Ma. Beatriz Vasquez ang on-duty midwives sa birthing center sa Badian.
Matud pa sa ilang reklamo, gibalibaran sila sa duha niadtong Hulyo 20, 2013 tungod sa rason nga premature pa ang bata sanglit pito pa kini ka buwan ug wala sila’y incubator maong gipalahos sila og tambalanan.
Apan pipila na lang ka tikang gikan sa emergency room sa Badian District Hospital nakaanak na si Regina sa traysikad ug nalahos katagak sa dalan ang ilang anak ug naguroy hinungdan sa kamatayon niini.
Nagtoo siyang kung gi-admit lang unta sila sa birthing center o ba kaha gipasakay sila og ambulansya buhi pa ang ilang anak.
Si Bruce, dihang gikahinabi sa Banat News sa telepono miingon nga nasayod siya nga mapasakaan siya og kaso apan siya malaumon nga ma-dismiss kini.
Siya midugang nga nagkauyon ang bana ni Regina ug ni Vasquez nga pasakyon na lang og traysikad ang ginang.
Sa iyang bahin, si Municipal Health Officer, Dr. Urduja Espiritu,miingon nga buot unta nilang i-settle gawas sa korte ang kaso apan miinsister ang magtiayon nga ilang patagmon ang mga akusado. (BANAT NEWS)
- Latest
