Abogado gidakop sud sa Palace of Justice

CEBU, Philippines - Gidakop kagahapon si Atty. Raul Sesbreño sa mga polis sa Palace of Justice pinasikad sa warrant of arrest tungod sa kasong serious illegal detention in relation to Republic Act 7610 or child abuse. Ang warrant of arrest penetsahan og Hulyo 22, 2013, gikan ni Judge Ester Veloso sa Regional Trial Court Branch 6 batok kang Sesbreño ug way piyansa nga gimando alang sa iyang termporaryong kagawasan.

Matud ni Sesbreño nga na-shocked siya sa dihang gidakop siya sa mga sakop sa  kapulisan sa ala 1:45 sa hapon sud sa opisina ni Atty. Jeoffrey Joaquino, clerk of court sa RTC Branch in Cebu. Matud niya nga naa siya’y pagduda nga panimawos kini batok kaniya sa mga naapektahan sa demolisyon sa Lawaan sa siyudad sa Talisay.

Base sa dokumento nga niadtong Septiyembre 7, 2011 si Sesbreño gipasanginlang misira sa balay sa usa ka Nestor Zapanta nga dunay tulo ka mga bata sa sulod sa tulo ka adlaw.

Lakip sa gipasakaan og kaso mao sila si Sesbreño, Jumbe Dadizon ug Court Sheriff Nestor Ng. Apan gi-dismiss sa fiscalya ang kaso batok ni Dadizon ug Ng tungod sa kakulang sa ebidensya.

Si Sesbreño bisan adunay posas mihangyo sa staff sa RTC Branch 6 nga mogamit og type writer aron paghimo og urgent ex parte motion to suspend enforcement of warrant of arrest.

Sa iyang mosyon, iyang giawhag ang korte  nga suspensuhon ang implementasyon sa warrant tungod kay kagahapon ra niya nadawat ang order ug duna pa siya’y kinse ka adlaw nga lugway aron maka- file og motion for reconsideration. Ang mosyon ni Sesbreño gipaabot pang desisyonan sa korte. (BANAT NEWS)