CSC mohatag og automatic eligibility sa lokal nga magbabalaod

CEBU, Philippines - Ang  Civil  Service  Commission (CSC) mohatag  og  automatic eligibility  sa lokal  nga mga  magbabalaod  sa  lungsod, siyudad ug  lalawigan sa nasud nga di na  mokuha pa  og  eksamin.

Kini  ang  gibutyag kagahapon  ni Ricardo I. Gabule, Personnel  Specialist  sa CSC7 atol sa Kapihan  sa PIA  nga  gipalanog  sa DYMR  kinsa  nagkanayon  nga  ang  pagpatuman  niini  epektibo  sugod  niadtong Mayo 1, 2013.

Mingon  si  Gabule  nga  may  duha  ka level  sa  civil  service  eligibility  ang  ihatag  ngadto  sa  mga  lokal  nga  magbabalaod  nga  mao  ang  first  ug  ang second  level eligibility.

Matud  ni  Gabule  nga  gikinahanglan  nga  may  unom  ka tuig  sa serbisyo  ug  may  72 units  sa kolehiyo  ug  makabayad  og  P500  nga registration fee ang  usa ka  magbabalaod  alang  sa  first  level  eligibility.

Samtang  ang  second  level  eligibility  kinahanglang  gradwado  sa upat  ka tuig  nga  kurso,  siyam  ka  tuig sa serbisyo  ug  makabayad  og P500  registration  fee.

Midugang  si Gabule  nga  kinahanglang  may  pamatuod gikan  sa Department  of Interior and Local  Government (DILG)  ang  tanang aplikasyon  bahin  sa gidugayon  sa  serbisyo  niini  sa katungdanan.

Samtang  sa educational background  nila  maggikan  na  ang  tanan  sa ilang  tagsa-tagsa  ka  eskuylahan.

Miingon  si Gabule  nga  ang  mga konsehal  sa barangay  daan  na  nga  gihatagan  sa maong  kahigayonan  sa CSC, kini  tungod  kay  anaa  kini  sa local government  code. Apan  ang  mga  magbabalaod  sa  lungsod,  siyudad  ug lalawigan  niini lang panahon  ni  Presidente  Benigno Aquino III giaprobahan  ang  maong  balaod  alang  sa ilang  automatic  eligibility.

Matud  pa  ni Gabule  nga wala  pa sila  makadawat  og mga  aplikasyon  dinhi sa rehiyon  gikan  sa  mga  lokal  nga  magbabalaod alang  niining  maong higayon. (BANAT NEWS)