Managhigalang gianod pulos patay

CEBU, Philippines - Patay na ang duha ka managhigalang gika-report nga na-missing human gipang-anod sa kalit nga pagdagayday sa baha gikan sa kabukiran sa lungsod sa Boljoon subay sa sapa sa Sityo Danao sa barangay Lower Becerril  sa maong lungsod.

Ang duha nga pulos patay nang napalgan sa kadagatan sa barangay Poblacion mao sila si Nelson Fuentes, 45 anyos ug Alvin Sesante,42, pulos namuyo sa maong lugar.

Matud ni PO1 Rex Pelonio sa Boljoon Police Station dihang nahinabi sa Banat News  nga ang duha nagkasabot nga manakop og kasili ug uwang sa sapa niadtong Sabado sa udto .

Apan wala sila makabantay nga kusog kaayo ang bunok sa uwan sa bukid ug kalit nga miawas ang sapa sa bul-og sa baha hinungdan sa ilang pagkaanod padung sa bukana sa sapa ngadto sa dagat.

Ang ilang mga kabanay nangayo og tabang sa mga opisyal sa barangay ug gi-report sa kapulisan  hinungdan sa gihimong  search and rescue operation.

Apan naabtan pa sa adlaw nga Domingo sa hapon una pa napalgan si Fuentes diha sa kadagatan sa maong barangay. Ug pagkagabii, napalgan usab ang lawas ni Sesante sa dagat.

Ang kagamhanan sa lungsod sa Boljoon ubos ni Mayor Merlou Derama gitakdang mohatag og hinabang pinansyal ngadto sa kabanay niini pagpahiluna sa patay’ng lawas.  (BANAT NEWS)