Shoplifter nasikop sa Polis

CEBU, Philippines - Nasikop sa kapolisan ang   usa  ka  shoplifter  kinsa  misipit  sa  butang  sa  iyang  hawakan  gikan  sa   tindahan   sa  Osmeña Boulevard, dakbayan sa Sugbo  sa miaging  hapon.

Ang suspek  giila  nga   si Johnny Booc, 34, lumad nga taga Barangay Ermita dakbayan sa Sugbo  apan  tua  na  magpuyo  karon  sa  barangay  Lawaan 1, lungsod  sa Minglanilla.

Si Julius Obra,  security  guard  sa Fashion Gallery  nga  tindahan  nagkanayon    nga namili ang suspek sa ilang mga baligya.

Nakauyon  kini  sa  mga  short  nga  gi-display   busa  gikuha kini niya  ug  gisuksok sa iyang   hawak ang maong item.  Sa  dihang  migawas  na  kini iya  kining  gibabagan  aron mahiling  ang  lawas.

Apan wala  niya kini  mahikapi  kay  misirit  og  dagan  busa  iyang  gigukod.

Nakit-an sila sa nagrondang mga  kapolisan  sa Cebu City Police Office nga gipangulohan ni PO1 Mark Twyn Catipay.

Nabawi sa mga kapolisan ang duha  ka  Ground Zero   brand  nga short nga mobalor og P600. Gidala  ngadto  sa   Waterfront Police Station ang  suspek  ug  gipriso  samtang  gipasaka  na  ang  kiha  batok  kaniya.( /WC) (BANAT NEWS)