Publiko gipabantay sa mga text scam

 CEBU, Philippines - Ang Department of Social Welfare and Development 7 (DSWD-7) mipahimangno sa publiko kalabot sa mga mikatap nga mga scam nga  mga text   message  nga mipunting sa   mga benepisyaryo sa Pantawid Pamilya Pilipino Program (4Ps).

Nasuta sa DSWD 7 ang mahitungod niining maong scam base  sa  mga  report  nga  ilang  nadawat  gikan  sa mga benepisyaryo sa 4Ps sa rehiyon.

Sa maong mga text message gisaysay niini nga ang mga recipient makadaog og P950,000 nga gikan ni Presidente Noy-Noy Aquino Foundation 4Ps Pantawid Pamilyang Pilipino Program isip second prize winner sa Handog Pangkabuhayan raffle promo with DTI P#9513 s'12.

Giklaro ni DSWD Regional Director Mercedita Jabagat nga dili tinuod nga ang ilang departamento nagpahigayon og promo o ba kaha draw.

Nasuta usab nga ang mga recipient gimanduan sa pag-text gilayon sa ilang kompleto nga ngalan, edad, address ug usab  trabaho.

Gimanduan ni Jabagat ang mga makadawat sa maong text sa pagtaho gilayon ngadto sa labing  duol nga opisina sa DSWD o ba kaha sa pag-text sa 09173815555.

Gipahayag ni Jabagat nga ang 4Ps nga programa wala manghatag og premyo apan ang maong programa naghatag og cash grant ngadto sa mga kabus nga kabalayan hulip sa ilang pagtuman sa mga kondisyones sa maong programa.

Tumong sa 4Ps nga programa ang paghatag og hinabang alang sa galamiton sa maayong panglawas ug usab pagpaedukar sa mga kabataan nga nahisakop sa kabus nga pamilya nga may panuigon gikan sa 0 hangtod 14 anyos. (/WC) (BANAT NEWS)