Namatay samtang naglinya aron kubrahon ang sweldo

CEBU, Philippines - Patay ang usa ka drayber sa garbage truck sa siyudad sa Talisay samtang naglinya diha sa city hall aron mokubra sa iyang sweldo niadtong Huwebes sa hapon. Si Talisay City Public Information Officer (PIO) Vincie Monterde miila sa namatay nga si Agripino Uyoa, 67-anyos, taga barangay Tabunok, Talisay.

Gibutyag ni Monterde nga si Uyoa usa ka job order (JO) ug dose na ka tuig nga nagserbisyo sa city hall isip drayber sa garbage truck. Giingong sa wala pa mahitabo ang maong insidente si Uyoa naglinya kini diha sa cash division aron kubrahon sa iyang sweldo niadtong Huwebes sa hapon.

Matud ni Monterde nga niadtong higayona pwerteng taasa sa linya ug pwerteng huota ug sa maong sitwasyon si Uyoa nagreklamo kining mihuot ang dughan ug maglisod na og ginhawa.

Giingong mikanaog si Uyoa gikan sa second floor ug milahos ngadto sa buhatan sa senior citizen sa ground floor ug didto kini magpundo.

 Apan giingong naglisud na sa pagginhawa si Uyoa hinungdan nga dali kining gidala ngadto sa tambalanan sa ubang mga kawani sa city hall.

Matud ni Monterde nga ang mayor gikatakdang mohatag og pinansiyal nga hinabang ngadto sa pamilya ni Uyoa.

Dugang niya nga giplanohan usab sa mayor ang pag-usab sa sistema sa pagpangsweldo diha sa cash division ug usa na niini mao ang laraw sa mayor nga ipaagi na sa Automated Teller Machine (ATM) ang pagkubra sa suholan.

Giingong usa lang ka tawo ang mohatag sa sweldo sa mga kawani hinungdan nga maghuot kini. Si Edwin Nierves ang labaw ni Uyoa mibutyag kagahapon sa Banat News nga mga alas 8:00 sa gabii niadtong Huwebes usa sa mga kaubang drayber ni Uyoa mitawag kaniya ug mipahibawo sa hitabo.

Matud ni Nierves nga gimandoan niya ang iyang sakop nga ipadala ngadto sa Talisay City District Hospital si Uyoa. Si Nierves miapas dayon ngadto sa tambalanan diin nakita niyang gitabang sa mga doktor si Uyoa apan nakabsan gyud kini sa iyang kinabuhi.

Si Nierves nagkanayon nga sa iyang pakisusi ngadto sa asawa ni Uyoa giingong wala kini makahinumdum nga ang iyang bana dunay gireklamo kabahin sa iyang panglawas.

Si Uyoa nagdawatan og P361.00 kada adlaw sa walo ka oras niyang trabaho ug nianang adlawa molahos na unta kini og trabaho alang sa iyang panggabii nga duty.

Apan matud ni Nierves nga posibleng duna nay gihambin nga sakit si Uyoa apan posibleng wala lang kini magbanha ngadto sa iyang pamilya.

Hinuon matud ni Nierves nga wala usab siya makapangutana sa doktor sa hinungdan sa pagkahuot sa dughan ni Uyoa.  (BANAT NEWS)