Minglanilla mag-rerouting

CEBU, Philippines - Ang hepe sa kapolisan sa lungsod sa Minglanilla Chief  Inspector Timmar Jomio Alam mibutyag nga ang kagamhanan sa lungsod dunay plano sa pag-rerouting sa mga sakyanan nunot sa grabeng ka-traffic diha sa ilang lungsod.

Mabantayan nga matag adlaw maghuot gyud ang trapiko diha sa lungsod ilabi na diha habig sa national highway sa barangay Poblacion.

Ang Minglanilla maoy gitawag nga “bottle neck” paingon ngadto sa habagatan tungod kay bisan og walay mga okasyon maghuot gyud ang mga sakyanan diha sa dalan tungod sa kahagip-ot sa karsada diha sa Poblacion.

Giingong usa sa hinungdan niini mao ang merkado publiko nga naa mahimutang duol sa national highway.

Si Alam mibutyag nga sa ilang meeting tali kang Mayor Lani Peña sa milabay’ng semana gipatun-an sa mayor ang plano sa pagpahigayon og rerouting sa mga sakyanan.

Matud ni Alam nga ang lungsod nagpatukod karon og bag-ong merkado publiko diha sa barangay Tulay ug ini’g kahuman niini posible mao na usab ang panahon sa pag-rerouting sa mga sakyanan.

Ang mga sakyanan nga gikan sa amihanan paingon sa habagatan adto na unya kini moagi sa Calajoan lusot sa Tulay samtang ang gikan sa habagatan lusot sa barangay Tungkop dayon ngadto sa Tulay

Sa pagkakaron matud ni Alam nga aron dili kaayo mohuot ang trapiko adunay ipamutang nga mga polis nga motabang sa mga traffic enforcers pag-manage sa dagan sa trapiko.

Ang gikonsiderar  nga mga rush hours sa Minglanilla alas 6:00 hangtud sa alas 8:00 sa buntag ug sa alas 4:00 sa hapon hangtud sa alas 7:00 sa gabii nga maoy sagad oras ilakaw ug ipamauli sa mga tawo.  (BANAT NEWS)