Mga taksi nga migamit og LPG unsa ka luwas?

CEBU, Philippines - Nabalaka ang mga konsehal sa dakbayan sa Sugbo sa seguridad sa panglawas sa mga drayber ug pasahero sa mga taksi nga migamit na og Liquefied Petroleum Gas pagpadagan sa sakyanan.

Ang konseho sa dakbayan miaprubar sa resolusyon ni Konsehal Eugenio Gabuya Jr. nga nag-awhag sa kadagkoan sa Department of  Labor and Employment (DOLE) nga pahibaw-on sila sa City Council kun unsay safety standards nga gipatuman sa ilang opisina aron kaprotehian ang mga drayber.

Wala masayop si Gabuya sa iyang kabalaka nga dunay mga “side effects” sa mga drayber sa taksi ang paggamit og LPG sa pagpadagan sa ilang mga sakyanan.

Hapit-hapit tanan nga mga taksi nga nagdagan dinhi sa Metro Cebu ug bisan sa ubang bahin sa nasud migamit na og LPG kay makadaginot man sa gasto ang mga drayber kay barato man ang LPG kun itandi sa presyo sa gasolina.

Apan ang Department of Health (DOH) mipagawas og report nga makadaut sa panglawas sa tawo kun kanunay ka makahanggap og LPG ilabi na kun adunay hungaw ang ilang mga tangke.

Daghang mga drayber sa taksi mireklamo nga morag kanunay maughan ang ilang tutunlan ug magsakit ang ilang mga lotahan nga wala nila batia sa pagmaneho nila kaniadto sa mga taksi nga gigamitan og gasolina.

Matud sa taga DOH nga ang pag-uga sa tutunlan ug pagsakit sa mga lotahan apil sa mga timailhan sa epekto sa kanunay’ng paghanggap og LPG. (BANAT NEWS)