7 ka pamilya sa Casuntingan ibalhin sa Paknaan

CEBU, Philippines -  Dugang pamilya   ang  pabalhinon  ngadto   sa relocation site  sa barangay  Paknaan   pinaagi  sa kagamhanan  sa dakbayan  sa Mandaue.

Kini  mao  ang  mga  molupyo  nga  anaa  pa sa mga  dapit  nga  gitawag  nga  danger  zone  sa barangay  Casuntingan.

Ang  maong  mga lugar  delikado  kaayo  kun  mokusog  ang  ulan  busa  ang  mga  molupyo  niini  gipasidan-an  na  nga  papahawaon.

Naglakip sa mga pamilya nga mabalhin ngadto sa 6.5 ka ektarya nga luna sa barangay Paknaan mao kadtong mga nagpuyo sa daplin sa sapa  ug daplin sa pangpang nga kuyaw kaayo nga matabonan sa higayon nga modahili ang yuta.

Mikabat  sa  pito ka pamilya sa barangay Casuntingan   ang  gimandoan  na  sa kagamhanan  sa pagbalhin  ngadto  sa Paknaan. Kini  human  sila masugamak  sa  pagdahili  sa yuta  sa  ilang  dapit  sa  miaging semana.

Si Tonypet Juanico nga maoy hepe sa  Housing and Urban Development Office (HUDO) nga nahinabi sa mga tigbalita miingon nga ang maong  mga pamilya  gihatagan     na  og  lista  sa mga  gikinahanglang  dokumento nga ilang ihatag ngadto sa Department of  Social Welfare  and Development Office. Matud pa niya nga ang maong luna nga 6.5 ka ektarya maoy mahimong relocation site sa 1,200 ka pamilya nga  kasagaran  nagpuyo sa daplin sa pagpang ug  sapa.

Ang  mga benepisyaryo sa maong luna mao  ang   gikan  sa  barangay  Casuntingan nga nakasinati og pagdahili sa yuta.

Si  Casuntingan barangay Kapitan Oscar  del  Castillo  miingon  nga ang maong  mga  pamilya  nasuwertehan    kay  nakahiklin  dayon  sa  pagdahili  sa  yuta  busa wala  sila  ka taboni  niini.  (BANAT NEWS)