Konseho mibakwi sauna nilang giuyonan
CEBU, Philippines - Gibakwi sa Cebu City Council ang pag-uyon nila nga ang wala magasto nga P2.9 milyones gikan sa Insurance Expenses sa dakbayan gastohon na lang pagsweldo sa mga janitor ug mga security sa City Hall.
Sayo pa nakombinsir na gayud unta ni Konsehal Noel Eleuterio Wenceslao ang mga kauban niya sa Konseho nga uyonan ang tinguha sa paggamit na lang sa P2,972,109 alang sa security ug janitorial expenses.
Ang mao nga kantidad gigahin g’yud unta alang sa pagbayad og insurance coverage sa mga sakyanan, mga building ug ubang katigayonan sa dakbayan sa Sugbo.
Apan dihang gibulgar sa Commission on Audit (COA) nga kapin sa P864 milyon nga kantidad sa heavy equipment, building ug ubang katigayonan wala gipa-insured sa administrasyon ni Mayor Michael Rama, nausab ang baruganan sa mga konsehal.
Ang resolusyon nga giaprobahan na unta sa konseho gipirmahan na gani ni Mayor Michael Rama apan kadaghanan sa mga konsehal mihukom nga bakwion nila ang giaprobahan nila nga resolusyon.
Matud sa mga konsehal nga dili tukma ang gihimo sa administrasyon ni Rama nga mituyo nga wala gastoha ang maong budget aron gamiton nila sa lain nga tumong.
Si City Administrator Jose Marie Poblete nangatarongan nga wala nila ipa-insured ang mga buldozer, pison, payloader ug uban pa nga heavy equipment apil ang building kay nagtuo sila nga walay mangawat niini nga kahimanan.
Apan ang COA miingon nga dili tukma ang gihimo sa mga opisyal sa City Hall. (BANAT NEWS)
- Latest
