Bakol mi-molestiya sa anak-anak

CEBU, Philippines - Usa ka 54- anyos nga ama-ama nga bakol ang nasikop sa kapolisan sa Casuntingan Police Station atol sa  follow-up operation human kini ireklamo sa asawa nga naaktohan niya kining milugos sa iyang anak sa unang bana.

Si Merto (tinuod pangalan gipugngan), lumulopyo sa nahisgutang lugar ang nasikop sa kapolisan human misumbong ang iyang asawa ug ang anak niini ngadto sa kapolisan kalabot sa nahitabong pag-among –among . Matud pa sa 12-anyos nga biktima natulog siya sa ilang katre niadtong Miyerkules sa kaadlawon dihang kalit lang nga misulod  sa iyang lawak iyang ama-ama ug kalit nga mimolestiya kaniya.

Misuway siya sa pagsiyagit ug gitulod ang suspek apan kusgan kini ug gihuboan na hinoon siya ug mipadayon sa dautan niyang gibuhat. Maayo na lang nga nakabantay ang inahan sa biktima ug kalit nga misud sa lawak ug gilayog ang suspek palayo sa iyang anak ug diretso silang misumbong ngadto sa Casuntingan Police Station.

Si Sr. Insp. Ramil Morpos nagkanayon nga atol sa interbyu ang bata kinsa kamanghoran sa upat ka mga anak sa asawa sa suspetsado ang kanunay nang gi-molestiya sa iyang ama-ama.

Matud pa nga buhaton kini sa suspek matag kini mahubog nga iatol usab nga wala diha ang inahan sa mga bata nga mao nay nanginabuhi para sa pamilya human maligsi sa trailer ang suspek ug nabakol.  (/EIM) (BANAT NEWS)