Nangutana kung may bomb threat nasaypan gidakop

CEBU, Philippines - Naaberya og makadiyot sa iyang biyahe ang usa ka pasaherong babaye nga padung sa Bacolod City tungod sa pagpangutana niya sa usa sa mga kawani sa Cebu Pacific diha sa Mactan Cebu International Airport kung duna bay mga bomb threats sa Cagayan de Oro City ug dinhi sa Sugbu kagahapon.

Giila ni Lapulapu City Police Office Director Sr. Supt. Rey Lyndon Lawas ang gidakop sa mga sakop sa Philippine Center for Aviation Security o PCAS7 sa MCIA nga mao si April Yatar,27,  nga usa ka kawani sa Isuzu Motors Corporation dinhi sa Sugbu.

Matud pa ni Lawas nanawag si Yatar sa buhatan sa Cebu Pacific sa MCIA sa milabay’ng Huwebes ug nangutana kung tinuod ba ang taho nga dunay hulga sa pagpamomba sa dakbayan sa Sugbu ug dakbayan sa Cagayan de Oro tungod kay lumargahay siya sa Bacolod sunod adlaw (kagahapon) luwan sa Cebu Pacific flight.

Si Joana Marie Leon sa Cebu Pacific nga maoy nakadawat sa tawag ni Yatar mitaho dayon ngadto sa PCAS 7  tungod kay ang pagsabot niya sa tawag usa kini ka bomb threat.

Kini maoy hinungdan nga kagahapon sa buntag giatangan na sa mga sakop sa PCAS si Yatar nga mosakay na unta sa Cebu Pacific flight alas 6:15 sa buntag ug gidakop.

Atol sa imbestigasyon nasuta sa PCAS 7 nga sayop ang pagsabot sa nakadawat sa tawag ni Yatar ug wala kini manghulga sa tugpahanan.

Gumikan niini gibuhian si Yatar ug nakalupad kini sa iyang flight ngadto sa dakbayan sa Bacolod.  (/EIM) (BANAT NEWS)