Kontraktor nakuryentihan kritikal

CEBU, Philippines - Kritikal ang kahimtang sa usa ka electrical foreman  nga kontraktor  human kini makuryentihi samtang nagtrabaho sa gikontrata niini nga sub-station sa kapolisan didto sa barangay Liboron siyudad sa Carcar niadtong Huwebes sa alas 10:50 sa buntag.

Ang   nabiktima  mao si Francisco Lapi, 53, minyo, nagpuyo sa Cabungahan siyudad sa Naga ug  foreman  sa gikontrato  niining  electrical  wiring   sa  sub-station office  sa kapolisan.

Si PO2 Abelardo Beton sa Carcar City Police   Station  mibutyag  sa Banat News  nga samtang  nagtrabaho  si Lapi sa  pagpanaod  og  wiring  sa  sub-station wala  mabantayi  niini  ang secondary line sa CEBECO.

Unya  aksidenting midapat ang   kabilya  nga  iyang  natumban  sa linya sa CEBECO.

Dihang  mi-ground  kini,  mikurog  sa kuryenti  ang  biktima ug  natagak sa yuta.

Dali  kining   gitabang sa iyang mga sakop ug gihatud  ngadto  sa Carcar City District Hospital apan tungod kay seryoso ang kahimtang niini gihatud  dayon  kini  sa tambalanan dinhi sa dakbayan sa Sugbo ug padayung gi-obserbahan sa mga doctor. (/WC) (BANAT NEWS)