Ward sa CCMC ipa-air-condition

CEBU, Philippines - Gusto sa direktor sa Cebu City Medical Center (CCMC) nga himoong air-condition ang pipila ka ward  sa ospital sa dakbayan apan wala dayon kini uyoni sa mga konsehal.

Si CCMC director Gloria Duterte nangayo og pagtugot sa mga sakop sa Cebu City Council nga mogasto siya og P5.4 milyones gikan sa gitawag og Medicare Trust Fund aron ipamalit og kahimanan.

Si Konsehal Margarita “Margot” Osmeña, tsirman sa Committee on Budget and Finance, miingon nga dili sila supak sa tinguha ni Duterte apan gusto lang sila nga mangutana kun dili ba mosaka ang bayranan sa mga pasyente kun himoon na nga air-con ang mga ward.

Basi sa plano ni Duterte nga mopalit ang CCMC og tulo ka Toner Split type air-condition nga kantidad og P200,000, unya lima pa ka Toner floor-mounted air-condition, P375,000; unom ka window-type nga aircon balig P180,000.

Ang mga ward nga giplanohan ni Duterte nga himoong air-con mao ang Intensive Care Unit (ICU), Operating Room, Female ug Male Medicare Units, Pedia ward, Dietary section, ug uban pa.

Ang labing daku g’yud hinoon nga gasto nga kuhaan sa mao nga kantidad mao ang pagpalit og tulo ka ICCU ventilator nga mokantidad og P3.8 milyones. (/WC) (BANAT NEWS)