Konsehal Tumulak misaway sa COA

CEBU, Philippines - Si Konsehal Dave Tumulak misaway sa Commission on Audit (COA) tungod sa pagpagawas og report nga ang dakbayan sa Sugbo nakalapas sa balaod tungod kay ang sweldo sa mga job order giingong gikuha gikan sa Calamity Fund.

Si Delia Monte de Ramos, COA cluster director for Local Government Units, miingon nga ang gihimo sa dakbayan sa Sugbo usa ka kalapasan sa lagda sa Republic Act 10121, ang Disaster-Risk Management   Law.

Ang mga government auditor miingon nga ang calamity budget gastohon lang g’yud unta sa mga proyekto nga magpugong sa katalagman ug gamiton sa pagtabang sa mga biktima sa kalamidad.

Apan matud ni Tumulak nga natural lang nga anha nila kuhaon sa maong budget ang sweldo sa mga JO nga maoy unang moresponde kun adunay katalagman nga mahitabo.

Gipasabot ni Tumulak nga kung magsalig lang ang kagamhanan sa dakbayan sa mga “volunteers” mahimong dugay kaayo nga makaresponde kun adunay katalagman.

Apil sa mga nagdawatan og sweldo nga gihulagway ni Tumulak nga “honorarium” mao ang mga sakop sa Barangay Basak-Pardo Emergency Response team nga kanhi iyang gidumala. Si Tumulak miingon nga mopadala sila og suwat ngadto sa COA pagpasabot sa isyu.  (/BDB) (BANAT NEWS)