Mga vendor mibalik na sa merkado sa Tabunok

CEBU, Philippines - Ang mga vendor sa  barangay  Tabunok,  dakbayan  sa Talisay   nagkabahin-bahin  og  baruganan  bahin  sa pagbalhin   sa karaang  merkado.

Gumikan  niini  si  Nora Dadula Carlos kinsa nangangkong presidente sa kinatibuk-ang grupo sa mga vendor   puwerting  laguta  batok  sa mga vendor nga miukopar karon  sa merkado sa Tabunok   ug  iya  kining  giingnan  nga walay  respeto sa kagamhanan.

Matud ni Carlos nga ang maong mga vendors maoy namugos nga mobalhin na sa merkado sa Tabunok bisan  hugaw pa kaayo kini.

Gipasabot ni Carlos nga angay  huwaton nga matukod ang  tulo ka andanang building sa merkado aron unta hamugaway sila.

  Si Mayor Johnny De los Reyes sa iyang bahin, mibutyag  sa mga tigbalita kagahapon nga igo lang siyang misunod sa gusto sa mga vendor,  hinungdan nga mitugot siyang moukopar na sila  sa merkado sa Tabunok.

Matud niya nga   sa  milabay’ng semana nakig-meeting siya sa mga vendors   didto  sa sports complex sa Tabunok ug  gipahigayon  ang secret balloting   nga  nagpapili  sa uyon ug dili uyon sa pag-ukopar sa daang merkado.

Matud  niya  nga  midaog  ang uyon nga moukopar   sa karaang  merkado  sa  Tabunok.

Ang mga vendors nga miukopar sa Tabunok mao ang namaligya og  isda, karne, utanon ug dry goods. (BANAT NEWS)