Drug pusher sa Medellin tiklo

CEBU, Philippines - Gisikop  sa   mga otoridad  ang  usa  ka drug pusher  didto  sa barangay Panugnawan, sa  lungsod  sa  Medellin   sa miaging  hapon.

Ang  nasikop  sa mga  sakop  sa  Provincial Intelligence Branch (PIB)  giila  nga  si  Eliseo Uy Leng alyas Ilay, 58,  ug ang  iyang  sinaligan  nga  si  Benjie Tuñacao Moniño, 26,  pulos molupyo sa maong dapit.

Matud pa sa team leader sa maong operasyon Insp. Armando Labora, nga duha sila ka adlaw’ng nagpaniid   kang Leng   gumikan  sa kaidlas  niini.

Dihang  nakita  nila  ang  suspek,  gipalitan  dayon  kini  sa ilang  kauban  og  duha  ka gagmay’ng paketi sa  shabu nga balor og P1,000.

 Dungan  sa paghatag  sa  shabu,  giposasan  dayon  sa kapolisan  si  Leng.

Miingon  si  Labora  nga  misuway  og  kulisiw  si Leng ug  ang  sinaligan  niini  nga  si Moniño  apan  napakgang  sa kapolisan.

Nasakmit gikan  sa mga  dinakpan  ang  duha ka dagkong paketi sa gituohang shabu nga mobalor og tag P25 mil, laing  upat ka medium size nga gibana-banang mobalor og P3,500.

Gawas niini, may   laing  36 ka mga gagmay’ng paketi sa gituohang shabu nga nagkantidad ang usa og tag P500.

  Gawas sa drugas   may  tulo ka armas   ang nasakmit  nga naglangkob sa  2  ka kalibre  .38   nga  revolver  ug  usa  ka  .45   kalibre  nga  pistola  nga gikatahong gigamit ni Leng kaniadto sa pagpamusil.

Gibutyag  ni Labora nga si Leng anaa sa ilang listahan sa drug watchlist sa dugay nang panahon   apan  wa dayon  hidakpi  tungod  sa kaidlas  niini.

 Dugang pa ni Labora  mohalin na  og   dili  mominus  tagkapin  sa P100,000  matag  semana   ug  iya  na  kining  ordinaryong  negosyo.

 Matud pa ni Labora nga si Leng nasikop na  kaniadto tungod sa kasong murder ug drugas ug gani ang armas nga gigamit sa pagpamusil mao ang ilang narekober nga calibre .45 apan  ila pa usab kini nga ipaubos sa ballistic examination. Hinuon  gipanghimakak  kining  tanan  ni  Leng  ug  bisan  ang  iyang  bata-bata   nga  si Moniño  lig-on  kaayo  sa ilang  pamalibad  sa mga  pasangil.

Sa pagkakaron gisuta pa sa kapolisan ang ilang nakuhang taho nga taga Sugbo ang supplier ni Leng sa mga ginadiling drugas.

Ang  duha  nagtingkagol  na  sa prisohan. (BANAT NEWS)