65 ka iro gipatay sa lethal injection

CEBU, Philippines - Mikabat sa 65 ka mga iro nga nadakpan sa dog pound sa dakbayan sa Talisay ang gipamatay ubos sa lethal injection .

Si Talisay City Veterinarian, Dr. Santiago Hortel nga nahinabi sa mga tigbalita kagahapon mibutyag nga kasagaran sa maong  mga iro gi-surrender  sa mga tag-iya ngadto sa dog pound tungod   kay  mamaak.

Apan  ang  uban niini ilang  dinakpan  sa  mga  barangay  nga  mo-request  kanila  pagsikop  sa  mga  libud-suroy  nga  iro.

Kahinumdoman nga tungod sa kontrobersiya sa “tambutso gassing” nga paagi sa pagpatay sa mga iro, ang milabay’ng administrasyon mipahunong sa operasyon sa dog pound sukad niadtong buwan sa Enero hangtud sa Hunyo niining tuiga.

Si Hortel mibutyag  nga mibalik ang ilang operasyon dihang milingkod na ang bag-ong administrasyon niadtong unang semana sa buwan sa Hulyo niining tuiga.

Sulod sa duha ka semana mikabat sa 65 ka mga iro ang ilang nasikop. Ang mga irong nadakpan ipundo pa  sulod sa tulo ka adlaw  sa dog pound nga nahimutang sa likod sa ihawan sa barangay Biasong.

Kun   walay molukat niining mga tag-iya patyon na nila  kini  pinaagi  sa  lethal  injection. (BANAT NEWS)