P3milyones balor sa gidaubang marijuana

CEBU, Philippines - Gidaoban   kagahapon  ang  kapin  sa  P3 milyones   nga balor  sa  marijuana    didto  sa headquarter  sa Cebu  Provincial  Police  Office (CPPO)  ning  dakbayan  sa Sugbo.

Kini  may  labot  sa   subsob nga kampanya  batok  sa  illegal nga drugas   nga  gilusad sa  CPPO.

Samtang 50 usab ka mga police nga naglangkob sa FTP, Night Watch ug anaa sa CPPO Headquarters ang gipaubos  sa  surprise  nga   drug test .

Ang  pagsunog  sa  kaliboan  ka  punoan  nga  marijuana  gihimo  pasado ala 1:00  kagahapon   sa  hapon.

Kini   gipangulohan ni Chief Supt. Danilo Constantino uban usab ni Sr. Supt. Patrocinio Comendador,  ang hepe  sa CPPO.

Matud pa ni Constantino nga ang maong  mga  tanom nga  gisunog  nagpamatuod     nga seryoso sila sa ilang kampanya batok sa illegal nga drugas.

Gipadayag usab ni Constantino nga dili sila mohunong sa kampanya  batok  niini  sa   tibuok  Central Visayas.

Aron  sa pagpakita nga  tinud-anay  ang  ilang  kampanya,  unang  gihinloan  ni Sr. Supt. Comendador  ang  kapolisan  pinaagi  sa   pagsurprisa  niini  og  drug  test.

Kining  50  ka  mga  polis  nga  gipa-drug  test   kagahapon, wala mahilakip   sa  unang  grupo  nga  gipa-drug test .

Giingong walay nahimong  positibo  sa   maong    drug test  kagahapon  lahi  sa  una  nga  may  duha  ka  polis  kinsa  nasuta  nga  positibo  nga  tiggamit  sa gidiling  drugas.

Sa  tulo  ka  higayong  pagpanunog  sa  mga tanom  nga marijuana  sulod  sa  pagdumala  ni  Comendador  sa  kapolisan  sa lalawigan  gikan    niadtong  Enero  hangtud karong  buwana ,  ang gidauban  kagahapon  maoy  labing  dako  og  kantidad  sa tanan. (BANAT NEWS)