Mga barangay supak sa gihangyo sa Comelec

CEBU, Philippines - Gisupak  sa mga  kapunongan sa  barangay  sa  Talisay  ang  awhag  sa Commission  on  Elections (COMELEC)  pagpangayo  og  P10,000  alang  sa umaabot  nga  election sa barangay  ug Sangguniang  Kabataan (SK).

Ang presidente sa Association of Barangay Council (ABC) sa dakbayan sa Talisay   nagkanayon  nga dili  sila  makatuman  niining  maong  awhag  sa Comelec.

Si Kapitan Charles Basillote sa Dumlog,  kinsa  maoy  presidente  sa ABC nagkanayon  nga ang 22 ka barangay sa Talisay pulos walay   hustong pundo nga  ikatak-op  sa gastuhanan sa eleksiyon sa barangay ug SK.

Ang Comelec mipagawas og resolusyon nga ang matag  barangay mogahin og dili moubos nga P10,000 nga pundo apan dili molapas sa 10 porsyento sa pundo sa ilang general fund alang sa umaabot nga eleksiyon.

Gibutyag ni Basillote nga atol sa ilang ABC board meeting sa milabay’ng semana ang mga opisyal sa kabarangayan mipadayag sa ilang pagsupak sa “sharing scheme” nga sugyot sa Comelec.

Ang kabarangayan walay   gahin  alang  sa  kalihukan  sa   election.

Ang ABC mipalabang  og resolusyon sa ilang pagpangayo og pundo  kang Mayor Johnny De los Reyes alang sa sharing scheme. (BANAT NEWS)