Duha ka ‘mangingilad’ nga milayat sa sapa nailhan na

CEBU, Philippines - Ang kapulisan miila na sa giingong mga mangingilad nga milayat sa sapa sa Barangay Canbanua, Argao sa miaging adlaw human sa kadiyot nga ginukdanay.

Ang duha mao ang magtiayong sila si Zenaida Gil, 40, ug bana niini nga si Gilbert Gil, 45, nga taga Masbate, apan nanimuyo sa Barangay Lagtang, Talisay City human sila giila sa anak ni Zenaida nga si Harvey Cabriana, 20, nga uban sa uyuan niini nga si Cristino Cabriana kagahapon sa buntag.

Human makita ang patay’ng lawas sa babaye diha sa punerarya positibo kining   giila ni Harvey nga mao si Zenaida Gil, ang iyang inahan.  Si Argao police chief, Insp. Alejandro Batobalonos, mibutyag nga kahibalo na ang pamilya sa mga suspek sa modus operandi ni Gilbert ug gani ila nang gihimangnuan si Zenaida sa dili na pagkuyog-kuyog kang Gilbert apan wala kini mupatuo.

“Nakahibalo na sila ana gibadlong na gani nila si Zenaida aron dili maamong ug dunay dakop dili man gyud mubiya,” matud ni Batobalonos.  Ang kapulisan ug ang mga opisyal sa barangay padayon pa sa ilang search and retrieval operations aron sa pagpangita kang Gilbert nga nagpabilin pang missing.

Ang mga suspek sakay sa itom nga Honda XRM motorcycle nga way plaka gigukod sa patrolcar sa kapolisan apan pagkakita sa unahan nga dunay roadblock giingong mi left turn ang duha padung sa sapa, apan gianod ang duha tungod sa kadako sa tubig bunga sa pagbaha. Apan tungod sa karatol ug dili suhito sa lugar, ang duha didto mitugpa sa sapa hinungdan nga sila nangaanod. (Ria Mae Y. Booc/EIM)

Mga hugaw nga kasilyas sa baybayon  Duljo ug Mambaling gipangguba

Giguba na sa mga kawani sa City Hall kadtong pribado nga “communal toilet” nga gitukod diha sa baybayon nga bahin sa Barangay Duljo-Fatima ug Mambaling diin gihimong negosyo sa tag-iya sa maong pansayan. Si Raquel Arce nga maoy hepe sa City Hall Prevention Restoration Order and Beautification Enhancement (Probe) mihulagway nga hugaw kaayo ang maong pansayan kay direkta lang sa dagat nga matagak ang hugaw sa tawo.        

Apan ingon niini ang sagad nga pagkahimo sa mga kasilyas sa mga lumulopyo nga nagpuyo daplin sa baybayon nga bisan og aduna sila’y pansayan apan ang hugaw ila rang ipagawas pinaagi sa tubo direkta ngadto sa dagat.

Si Arce mibutyag nga pwerteng daghana nga mga basura nga ilang nakuha kagahapon nga nagtipun-og na diha sa baybayon ug gigamitan og backhoe aron pagpadali sa paghipos sa mga basura.

Matud ni Arce nga ipadayon nila karong adlawa ug bisan pa sa sunod adlaw ang maong gimbuhaton. Mga lumulopyo didto sa mao nga lugar nangalipay nga gitagad na sila sa dakbayan.

Ang mga sakyanan sa Department of Public Services (DPS) giawhag usab nga mosulod na sa mao nga lugar bisan sa  sudlonong bahin sa Mambaling ug Duljo-Fatima aron sa paghakot sa mga basura. (BANAT NEWS)