Garces kaupat na balhin-balhina og opisina
CEBU, Philippines - Ika-upat na nga higayun nga gibalhin og buhatan ang pangulo sa Provincial Social Welfare and Development Office (PSWDO) sa Kapitolyo sulod ning tuiga.
Si Gob. Hilario Davide III nimando na usab kang PSWD Officer Marivic Garces sa pagbalhin ngadto sa Danao District Hospital sugod niadtong Agosto 2, 2013.
Wala hinuon giklaro sa memorandum nga gipetsahan og Agosto 2, 2013, apan si Davide nimando kang Garces sa pag-report sa hepe sa tambalanan nga si Dr. Olivia Dandan.
Human sa siyam ka tuig, si Garces unang gipabalhin sa Integrated Provincial Health Office (IPHO) sa dihang nilingkod isip kasamtangang gobernador si Bise Gob. Agnes Magpale nunot sa pagkasuspenso ni kanhi gobernador Gwendolyn Garcia.
Nipuli kang Garces si Evelyn Senajon apan gibalik kini sa PSWDO sa dihang nahibalik si Garcia sa katungdanan niadtong Hunyo 20 human napupos ang iyang suspensiyon.
Pipila ka adlaw human nilingkod si Davide niadtong Hulyo 1, 2013, gibalhin na usab si Garces sa Provincial Disaster Risk Reduction and Management Office (PDRRMO).
Ang kasamtangang pangulo sa PDRRMO nga si Neil Angelo Sanchez nagplano nga iyang himoong training officer si Garces ug sa samang higayon pangulo sa secretariat sa PDRRM Council.
Apan wala magdugay sa pwesto si Garces nunot sa pagbalhin kaniya sa Danao District Hospital bisan nagpabilin kaniya ang posisyon isip PSWD Officer. (BANAT NEWS)
- Latest
