Mega job fair ipahigayon
CEBU, Philippines - Dakung “job fair†ang ipahigayon sa Department of Manpower Development and Placement (DMDP) unya sa Septiyembre 7 diin kadtong mga walay trabaho gipaabot nga matabangan nga makakita og panginabuhian.
Matud ni DMDP chief Suzanne Ardoza nga ang mega job fair nga himoon nila karong unang semana sa Septiyembre salmotan sa gibana-banang 60 ka kompaniya nga manginahanglan og kawani.
Gikan kaniadtong Enero hangtud sa Hunyo 1,513 ka tawo nga nangita og trabaho ang nadawat dayon “on the spot†samtang ang uban didto na gidawat human sa paglabay sa mga semana, ilabi na kadtong alang sa trabaho sa abroad.
Sa laing bahin, ang DMDP gusto nga mopalambo sa iyang serbisyo ngadto sa publiko pinaagi sa pagtudlo sa katawhan sa mga pamaagi unsaon nila nga makakita dayon og pangwartahan.
Kini pinaagi sa pagtudlo kanila og mga kurso’ng bokasyonal nga walay bayad aron sila madawat pagdali kun mangaplay sa lain-laing kompaniya.
Bugti niini, gusto ni Ardoza nga mangayo sila sa DMDP og dako-dako nga budget para sunod tuig.
Karong tuiga, P16.6 milyones ang giaprobahan nga budget sa DMDP apan gusto ni Ardoza nga himoon kini nga P20 milyones.
Sa P20 milyones nga budget unya, ang mga P14 milyones maoy gamiton alang sa sweldo ug ubang benefits sa 61 ka kawani sa DMDP, ug ang uban mao nay gastohon sa uban nila nga mga proyekto. (BANAT NEWS)
- Latest
