Tunghaan naghiusa pagsuporta sa DSWD
CEBU, Philippines - Ang mga nagkadaiyang tunghaan sa Metro Cebu nagtinabangay aron suportahan ang implementasyon sa National Community Driven Development Program (NCDDP) sa Central Visayas.
Kini mao ang University of the Philippines Foundation (USPF), Southwestern University (SWU) ug usab St. Theresa's College (STC) ,sumala ni Semeon Remata III sa Department of Social Welfare and Development (DSWD 7). Miingon si Remata nga ang NCDDP usa ka scale-up version sa Community-Driven Development (CDD) nga gigamit nga stratehiya ug nga nasuta nga epektibo kaayo sa Kapit-Bisig Laban sa Kahirapan – Comprehensive and Integrated Delivery of Social Services (Kalahi-CIDSS) nga usa ka programa sa DSWD alang sa pagpaminus sa kakabos.
Dugang pa ni Remata nga tungod kay naaprobahan kini isip nasudnong programa sa sayo pa ning tuiga sa National Economic Development Authority (NEDA) Board nga gipangunahan ni presidente Benigno Aquino III, ang NCDP iimplementar sa tuig 2013 hangtod 2019 diin magsilbi sa 900 ka mga kabus nga lungsod sa nasud.
Gipadayag ni Remata nga sa Central Visayas, ang NCDDP mosilbi sa 39 ka lungsod sa probinsya sa Sugbo, 44 sa probinsya sa Bohol, 16 sa probinsya sa Negros Oriental samtang 5 usab sa probinsya sa Siquijor. Kini tungod kay nasuta nga kining maong mga dapit daghan kaayong kabus nga mikabat sa 26.5 porsyento base sa record gikan sa 2009 National Statistical Coordinating Board (NSCB).
Ang Central Visayas anaa sa ika-3 nga lalawigan nga adunay labing daghang lungsod nga silbihanan sa programang NCDDP.
Ang tulo ka mga tunghaan nagkasabot sa pagporma og consortium aron malukop ang gilapdon sa CDD operations.
Matud pa ni Rosario E. Sequitin Consortium Coordinator and USPF Social Work Department Chairperson nga ang maong consortium usa ka panag-alayon tali sa DSWD 7 sanglit nag-atubang man kini karon sa hagit sa pagpang-hire og 692 ka staff alang sa implementasyon sa NCDDP.
Ang 103 niini magsugod sa Oktubre 2013 ug ang 589 niini magsugod sa Enero 2014. Sa bahin usab ni DSWD 7 Assistant Regional Director Nemia C. Antipala, siya miingon nga ang ilang ahensya nagkinahanglan og project implementors kinsa adunay batakang kaalam, katakos ug usab kinaiya sa community organizing. (BANAT NEWS)
- Latest
