Kapitolyo misusi sa kadalanan

CEBU, Philippines - Gisusi karon sa Kapitolyo ang kahimtang sa kadalanan sa lalawigan sa Sugbo nunot sa kusog nga mga pag-ulan ug pagbaha.

Matud pa ni Gob. Hilario Davide III nga kinahanglan gyud masusi ang mga kadalanan nga iya sa kagamhanang probinsiyal human nahitabo ang mga pagdahili sa yuta sa mga dakbayan sa Sugbo ug Mandaue sa niaging adlaw.

Gitahasan ni Davide si acting provincial engineer, Hector Jamora, sa pagsusi sa mga kadalanan.

Lakip sa gipangayoan ni Davide og report ang kasamtangang pangulo sa Provincial Disaster Risk Reduction and Management Office (PDRRMO), Neil Angelo Sanchez, labot sa mga dapit nga daling modahili ang yuta nga moresulta sa pagkaguba sa kadalanan.

Matud pa ni Davide nga daghang mayor ug mga barangay kapitan ang nangayo na og tabang sa iyang buhatan nga mapaayo ang kadalanan sa ilang dapit.

Gani sa miaging semana, si Pinamungajan Mayor Glenn Baricuatro miduso sa buhatan ni Davide sa report sa iyang municipal engineer labot sa gusbat nga kahimtang sa dalan gikan sa barangay Poblacion hangtud sa Lamac nga iya sa kagamhanang probinsiyal.

“Mao na mangayo ko og update sa atong provincial engineer kung unsay mabuhat nato ana,” sumala pa ni Davide.

Matud pang Davide nga mangita pa usab og pundo ang kagamhanan sa lalawigan aron ipaayo ang maong mga karsada.

Ang Kapitolyo karong tuiga adunay gahin nga P30 milyones alang sa pag-atiman sa kadalanan ubos sa Provincial Engineering’s Office. (/WC)  (BANAT NEWS)