Taga Duljo-Fatima supak Globe cell site tukoron

CEBU, Philippines - Usa  ka petisyon ang  iduso  karong  adlawa sa  mga molupyo  sa  barangay Duljo-Fatima,  ning  dakbayan  sa  Sugbo   ngadto  sa konseho  sa barangay  nga  nagsupak  sa plano  sa Globe Telecom  sa pagtukod  og  cell  site  sa maong  lugar.

Si Renil  Oliva,  information officer sa  DINA Federation INC. mibutyag  sa Banat News   nga  usa  sa hinungdan  sa pagsupak sa  mga molupyo  mao  ang kabalaka  nila  nga  mataptan  sila og  sakit nga  makamatay  gumikan sa cell  site.

Si  Oliva   nagkanayon  nga  si  Eduardo Abella,  presidente sa Duljo Integrated Neighborhood Association (DINA) miingon  nga  ang  unang  mibabag  sa maong  laraw  sa Globe  mao  ang  mga  inahan.

Gawas  sa  mga  inahan,  ang  mga  nagsabak  nga  babaye  labing  nabalaka  nga  maapektohan  ang  ilang  gisabak  sa radiation  sa cell  site,  busa  naghiusa  sila  sa pagsupak  niini,  matud pa  ni  Oliva. Midugang  si  Oliva  nga  ang  cell  site  sa Globe  gusto  nga anha  itarok  sa rooftop  sa barangay  hall.

Apan  tungod  kay  bisan  ang  mga  lalaki  nabalaka  sa  mga  estorya  nga  mohugpa  ang  mga  nagkalainlaing  sakit  sa lawas  sa tawo  kun  mapiskan  sa radiation  sa cell  site,  hinungdan  nga  daghang  mipirma  sa maong  petisyon.

Hinuon  kun  maaprobahan  sa  konseho  ang  maong  cell site,  si  Oliva  miingon  nga  kinahanglang  himoon  nila  ang  pagtuki  niini  ug palawman  pag-ayo  ang  pagsusi  kun  tinuod ba  ang  mga  tabi-tabi  bahin sa  dautang  epekto  sa cell  site.

Miingon  si  Oliva  nga  bisan  si  Abella  nagkanayon  nga  kun  magtukod  og  cell  site  ang  Globe angay  nga adto  kini  ibutang  sa  mga  lugar  nga walay  tawo  aron  walay  mabiktima  sa bug-at  nga  mga  balatian.

Matud  ni  Oliva  nga  wala  hinuon  ikabutyag sa  mga  nanabi  kun  unsang  mga  sakita  sa tawo  ang  mamatyan  kun  makahanggap  sa radiation.

Apan  sukad  sa miaging  Hulyo  gipapirmahan  na  sa mga  misupak  ang  maong  petisyon   dihang  nasuta nila  nga  tulo  ka  konsehal  sa barangay  nga  sila  si Abelgas, Cabatino ug Padilla  mipakita  sa ilang  hugot  nga  pagdili  niini.( /WC)  (BANAT NEWS)