Gibiyaan sa asawa naghikog

CEBU, Philippines - Gumikan  sa kaguol  nga  gibiyaan  sa asawa, usa ka welder  naghikog ug  napalgang  patay  sulod  sa usa ka  pansayan sa  F. Calderon Extension, sa barangay  Ermita,  dakbayan sa Sugbo,  kagahapon  sa alas 5:00  sa buntag.

Ang  naghikog  giila  nga  si Guillermo  Pongase, 42, minyo, welder ug  nagpuyo  sa Makro,  Dakbayan  sa   Mandaue.

Si Omel  Pongase, 30, manghud  sa  naghikog  nakamatngon  nga  lawom  ang  problema  sa  iyang  igsoon.

Kini  tungod  kay  usa  na  ka  tuig  nga gibiyaan  kini  sa iyang  asawa    kinsa  giingong nangabit  og  laing  lalaki.

Sa pagsusi  sa kapolisan  nasuta  nila  nga  liston  sa sapatos  ang  gigamit  sa paghikog  ni  Pongase.

Kini  pinaagi  sa pagsumpay-sumpay  sa  liston  ug  ang  tumoy  niini  maoy  gihikot  sa iyang  liog  samtang  ang  pikas  tumoy didto  igaid  sa sagbayan  sa  pampublikong  pansayan  sa maong  lugar.

Naabtan  kini  sa mga  otoridad  nga  migahi  na ang  lawas    ug  gituohan nga  tunga  pang  gabii  kini  nabugtoan  sa kinabuhi.  (BANAT NEWS)