Mangingilad nanglayat sa sapa usa patay

CEBU, Philippines - Patay nang napalgan ang usa ka babaye nga gianod sa sapa ug pabiling na-missing ang iyang kaubang lalaki nga miambak sa sapa sakay sa ilang motorsiklo kay dili magpadakop sa mga polis nga migukod kanila human sila gialarma tungod sa pagpangilad.

Ang insidente nahitabo sa barangay Montpeller sa lungsod sa Argao kagahapon sa alas 8:00 sa buntag.

Ang babaye ug lalaking na-missing hangtud sa paghimo ning balita wala pa gyud mailhi  sa kapulisan ug kung taga asang lugar nagpuyo apan pulos gihulagway nga hingkod na ang panuigon ilabi na ang babaye nga napalgan kagahapon diha na sa Sityo Luwak sa barangay Canbanua sa lungsod sa Argao.

Si PO3 Benjamin Gerozaga sa Argao Police Station mibutyag sa Banat News nga ang babaye ug lalaki maoy gitumbok nga miilad sa usa ka Nomeriano Alviso, 66- anyos, nagpuyo sa barangay Montpeller.

Matud pa nga ang mga suspek mitanyag og libreng pagpa-blood pressure (BP) sa biktima ug giingong gipahibalo siya sa duha nga high blood. Ang biktima giingong migawas sa ilang balay kay iyang gitawag ang asawa aron mao na usab ang magpa BP apan sa pagbalik niya wala na ang mga suspek ug nakay-ag na ang ilang mga butang ug pagsusi nahanaw usab ang ilang kwarta nga P1,800.

Dali dayon silang nangayo og tabang sa barangay ug nagkontakay dayun sa mga hand held radios ang mga tanod lakip sa kasikbit nga barangay hangtud nga nakaabot sa kapulisan kinsa daling miresponde.

Matud pa nga samtang nagtungas ang patrolcar sa  kapulisan nasugatan nila ang mga mangingilad nga padulhog luwan sa usa ka Honda  XRM kolor itom nga walay plate number. Si SPO4 Esteban Elbuera maoy nisinggit sa mga suspek pagpahunong ug motahan apan giingong namalik sila sa ilang agi hinungdan sa nahitabong ginukdanay.

Usa ka roadblock ang gimuntar sa tumoy sa dalan apan dihang na-corner ang duha sa nahitaboan giingong miliko ang duha padung sa sapa ug didto nangambak sa ubos uban sa ilang motorsiklo ug nanglangoy na lang paubos.

Apan tungod sa kusog nga bul-og sa baha gianod ang mga suspek  ug nagkabuwag ug ang babayeng suspek  naugkat kini didto na sa barangay Canbanua apan wala nay panimuot hinungdan nga kini gidali paghatud sa Isidro Kintanar Hospital apan gideklarar kini nga dead on arrival.

Samtang ang lalaki nga suspek pabilin pang missing sa paghimo ning balita ug padayun pang gipangita sa kapulisan.

Gitataw sa kapulisan daghan na ang mga molupyo sa maong lugar ilabi na sa bukirang bahin ang mireklamo nga nailad sa mga suspek nga motanyag og BP unya ilaron ang kustomer ug kuhaon ang ilang alahas dayon mosibat. (BANAT NEWS)