Young Minds Academy forum gipahigayon
CEBU, Philippines - Gipahigayon ang Young Citizens Forum 2013 alang sa mga scholar sa Young Minds Academy (YMA) sa miaging Sabado didto sa Eduardo Aboitiz Hall sa Ramon Aboitiz Foundation Inc.'s (RAFI) Eduardo Aboitiz Development Studies Center (EADSC) ning dakbayan sa Sugbo.
Gitumong ang maong kalihokan sa paghimong abtik sa mga batan-on alang sa pagpanguna sa mga kaugmaran sa komunidad aron pagtukod sa labing maayo nga Sugbo,
Ang maong forum nagsilbi usab nga lugar alang sa mga scholar sa YMA sa pagpamahin sa ilang kasinatian, nakat-onan ug mga plano ugma damlag.
Ang resulta sa ilang pagpaniid sa komunidad nga gidestinohan kanila nga local government unit (LGU) sa Metro Cebu, maoy usa sa ilang gipresentar sa maong forum.
Didto ila usab nga giladlad ang ilang rekomendasyon ngadto sa LGU ug sa mga molupyo ilabi na ang mga lider sa matag komunidad.
Ila usab nga gibatbat didto ang mga mahinungdanong kasayuran bahin sa ilang pagpanukiduki sa nadestinohan nilang LGU pinasubay sa Mega Cebu 2050 Development Strategies.
Usa sa labing dakong bahin sa YMA, mao ang youth leadership and citizenship program sa RAFI, pagpataas sa pagpakabana sa mga scholar sa YMA bahin sa mga suliran ug mga hagit nga giatubang sa matag komunidad.
Pinaagi sa mga sesyon, pagpanukiduki, ang mga scholar nakabaton og lawom nga pagsabot sa kasamtangang kahimtang sa matag komunidad.
Kini ang naghatag kanila og higayon nga makaugmad og mga butang nga ikaayo sa komunidad nga makatabang sa pagsulbad sa mga suliran sulod sa gihimong tema nga mao ang urban development.
Ang YMA usa ka programa sa RAFI-EADSC nga ubos sa Leadership & Citizenship focus area.
Tumong niini mao ang pag-ugmad sa batan-ong mga lider ugma nga mohatag og maayong pagpanguna sa komunidad alang sa mga kausaban nga gikinahanglan sa panginabuhi, kultura ug uban pa. (/WC) (BANAT NEWS)
- Latest
