Taga NDU gibansay sa RAFI paggama’g nursery

CEBU, Philippines - Gipahigayon  sa Ramon Aboitiz Foundation  Inc,  ang  duha  ka adlaw  nga   pagbansay   bahin  sa pagtukod  og  nursery  sa mga  lubangong  kahoy didto  sa Notre Dame University (NDU)  sa  miaging semana.

Gitambongan  ang  maong  training  sa pinili  nga  mga  estudyante  nga  mikuha  sa  National Service Training Program (NSTP) nga  klase,  ingon  man  mga  tinugyanan sa  People’s Organization,  ug  ang uban  mga  membro sa  faculty   ug  mga  kawani  sa  eskuylahan  ang  mitambong  sa maong  pagbansay  niadtong  Hulyo 26  ug  27, ning  tuiga.

Lakip  sa  lektura   ang  bahin  sa tinubdan  sa mga  liso  nga  paturokon  ug  ang  pagpatubo  niini,  pagbalhin  og  tanom ,  ang  bahin  sa pagpili  sa klase  sa yuta,  ang  gidaghanon nga  yuta  sa matag  kahon, ug  ang  pagsagol  niini.

Lakip  usab  nga  gihisgutan  ang  bahin  sa kaakohan  sa  mga  wati  nga  maoy  mopadali  sa pagpalata  sa tamnanan, ang  butanganan  sa wati,  pagkaon  nila,  layout sa nursery, ang  pag-ani,   ug  matang  sa wati  nga  gamiton  alang sa vermin composting.

Didto  himoa  ang workshop  ug  demonstrasyon   sa bag-ong  nursery  sulod  sa NDU  campus.

Ang   nursery  sa tulunghaan  sa NDU gigastohan  sa  Cotabato Lights & Power Company.

Ang NDU kauban  ra  usab   sa RAFI   nga  usa ka  membro  sa  Catholic Educational Association of the Philippines (CEAP).

Kining  maong  paningkamot  sa RAFI  ubos  sa iyang  Integrated Development Unit's Generation REdemption, and Expansion of Natural resources Initiatives in the Philippines (GREENIN) Program   aron  pagsiguro  alang  sa mapadayonon   nga  kalihukan   sa pagpananom  og  kahoy  sa  mga  lugar  nga  wala  nay  kahoy.

Usa  kini  sa katuyoan  sa RAFI  nga  mapugngan  ang  pagbanlas  sa yuta  ilabi  na  sa mga  dapit  nga  bakilid  ug  mapalabong  pagbalik  ang  kakahoyan  sa  mga  kabungtoran  sa palibot  sa nasud.

Ang GREENIN Philippines Program   usa  sa  mga  programa  ubos  sa  Integrated Development focus area sa RAFI.

Tumong  niini  mao  nga  masulbad  ang  mga suliran  sa kalikopan pinaagi  sa paprotiher,  konserbar  ug  sa  pagpahiuli  sa kalasangan  sa nasud. Ang  ubang   mga  proyekto  sa RAFI ,  mao  ang Micro-finance & Entrepreneurship, Culture & Heritage, Leadership & Citizenship, and Education. (/WC) (BANAT NEWS)