Pundo’ng Salimbangon wa ipagawas ni Corro

CEBU, Philippines - Kasamtangang gihunong ni Daanbantayan Mayor Augusto Corro ang pagpagawas sa pundo ni Kong. Benhur Salimbangon nga gideposito sa lungsod sukad sa miaging administrasyon alang sa iyang Benhur Health Card program. Apan giklaro ni Corro nga nangita lang una siya sa basehanan sa pagpagawas sa pundo sama sa memorandum of agreement tali sa munisipyo ug ni Salimbangon.

“Nangutana lang ko niana nga unsa may guidelines ana nga sila man diay magpili og kinsa’y hatagan niana, kinsa’y maka-avail ana,” matud pang Corro.

Si Salimbangon mibutang og  kuwarta sa mga munisipyo sa Daanbantayan, Medellin ug Bantayan human gikataho nga wala na dawata sa mga district hospital nga iya sa Kapitolyo ang iyang Benhur Health Card sa dihang milingkod si Bise Gob. Agnes Magpale isip kasamtangang gobernador sa  pagkasuspenso si kanhi Gob. Gwendolyn Garcia og unom ka buwan.

Si Magpale sakop sa Liberal Party samtang si Salimbangon kaalyado ni Garcia sa One Cebu.

Si Salimbangon mihatag og P1.25 milyones sa Daanbantayan panahon ni kanhi mayor Maria Luisa Loot nga iyang kaalyado alang sa mga pasyenti sa district hospital sa lungsod.

Matud pa ni Corro nga gipahibawo siya sa ubang opisyal sa munisipyo nga walay MOA nga napirmahan sila si Salimbangon ug Loot bahin sa maong  pundo.

Andam makigtagbo si Corro kang Salimbangon subay sa sugyot sa pangulo sa Association of Barangay Council, Konsehal Rex Novabos.

Giklaro ni Corro nga samtang wala pa siya’y basehanan sa pagpagawas sa pundo ni Salimbangon isip bayad ngadto sa Daanbantayan District Hospital, dili una siya mopirma niini. (/WC) (BANAT NEWS)