Illegal structures sa coastal barangay sa siyudad gub-on sa City Hall ugma

CEBU, Philippines - Determinado gyud ang mga sakop sa City Hall clearing team nga moguba sa mga illegal structures nga gitukod sa kabaybayonan sa Barangay Dulho-Fatima ug Mambaling ugmang adlawa.

Si Raquel Arce nga maoy hepe sa Prevention Restoration Order and Beautification Enhancement (PROBE) miingon nga ipatuman niya ang balaud bahala na kun kinsa ang maigo.Matud ni Arce nga ang mga tag-iya sa illegal structures nga gitukod lapas na sa seawall ila na nga gipahimangnoan nga boluntaryo nilang gub-on ang ilang mga estraktura apan hangtud karon daghan pa ang wala motuman.

Ang mga sakop sa Reduce Danger Zone (ReDZ) misuhid sa kabaybayonan nga bahin sa Dulho-Fatima ug Mambaling kaniadtong miaging semana ug nakita nila ang daghang mga illegal structures.Gani gipangguba na nila ni Arce ang uban kaniadtong Miyerkules apan ang mas dako nga clearing operation pagahimoon gyud ugma diin daghan na nga mga kawani sa City Hall ang moapil.  Ang mga illegal structures gihimo nga pansayan nga pabayran sa mga tawo nga mogamit, samtang ang uban gihimo nga buwaranan sa mga isda ug bodega niini.( /EIM) (BANAT NEWS)