Drug pusher tiklo

CEBU, Philippines - Nagtingkagol sa karsel ang usa ka babaye human kini masikop atol sa  buy-bust operation  nga  gilusad  sa mga sakop sa Regional Anti-Illegal Drugs Special Operations (RAIDSOTG)  didto sa barangay Pusok, San Breeze, dakbayan sa Sugbo  sa miaging  gabii.

Ang   suspetsado   mao si Rizalinda Cadungog, hingkod , nga   molupyo sa maong dapit ug gihulagway nga level  2  drug pusher.

Sa nasayran ang mga sakop sa RAIDSOTG nakadawat og impormasyon kalabot sa kakusog   sa pamatigayon  sa gidiling  drugas sa dapit ni Cadungog.

Hinungdan  nga ila  kining  gipanid-an    ug  dihang  nasuta  nila  nga  positibo, dali silang mipahigayon og buy-bust operation. Gipalitan  dayon  sa kapolisan  si Cadungog og usa ka gamay’ng paketi sa gituohang shabu nga  balor og  P200.

Sa   pagtunol na ni Cadungog   sa  drugas  dali usab  kini nga gisikop sa kapolisan.

Matud pa sa  operatiba sa RAIDSOTG  nga si Cadungog maoy misawo sa negosyo sa iya ra usab nga kaliwat   kinsa  napriso   kaniadtong  2011 tungod usab sa drugas.

Nasayran  sa  mga  otoridad  nga  giingong makapagawas og 200 ngadto 250 gramos nga gidaghanon sa drugas si Cadungog  matag  adlaw   ug  gihulagway  kini   nga  level 2 drug pusher.

Samtang si Cadungog  mihimakak   nga mamaligyaay siya og ginadiling drugas sa ilang dapit ug silingang barangay.

Sa pagkakaron   nagkagulkol  na  sa prisohan  si  Cadungog  samtang  gihikay  na  ang  kaso  nga  ipasaka  batok  kaniya. WC (BANAT NEWS)