Del Mar ug Salimbangon pa maoy dunay komitiba sa kongreso
CEBU, Philippines - Sila pa lang si Kong. Rep. Raul del Mar ug Kong. Benhur Salimbangon ang nakakupot og komitiba sa Ubos Bay-Balauranan sa tanang kongresista nga Sugbuanon.
Base sa website sa Kongreso, nagpabilin kang Salimbangon ang Committee on Aquaculture and Fisheries Resources nga iyang gikuptan sa niaging termino samtang si del Mar sa Committee on Interparliamentary Relations and Diplomacy.
Sagad nga gihimo sa Kongreso ang dili paghatag og komitiba sa mga bag-ong kongresista.
Ang mga bag-o pa sa pwesto mao sila si Kong. Gerald Anthony Gullas Jr., Kong. Wilfredo Caminero, Kong. Gwendolyn Garcia, Kong. Aileen Radaza, ug Kong. Rodrigo Abellanosa.
Sama ni del Mar, si Kong. Joseph “Ace†Durano nibalik na usab sa pagka-kongresista human sila nakaalagad sa niaging mga kongreso.
Samtang si Kong. Gabriel Luis Quisumbing nasublian sa niaging eleksiyon ug iyang gipahibawo sa DyDD kagahapon nga siya ang vice chairman sa Committee on Appropriations.
Adunay 58 ka komitiba sa Ubos Bay-Balauranan diin 10 pa niini ang bakante. Samtang adunay 11 ka special committees diin unom niini ang bakante pa. (/EIM) (BANAT NEWS)
- Latest
