Police nadunggaban, suspek napusilan

CEBU, Philippines - Nalandig sa tambalanan ang usa usa ka off duty nga polis human kini gidunggab apan ang nakadunggab kaniya iyang napusilan pasado alas 8 sa miaging gabii diha sa dalan Sanciangko, dakbayan sa Sugbo.

Si PO1 Shaundemar Bagol nga nadestino sa Police Station 1  nakaangkon og samad dinunggaban sa tuong bahin sa iyang lawas human siya giingong gidunggab ni Alfredo Merinello.

Giingong si Bagol nagmaneho sa iyang motorsiko niadtong tungura dihang iyang nakit-an si Merinello nga nagsukbit og kutsilyo ug naghukas og t-shirt.

Tungod niini, gisita ni Bagol si Merinello apan imbes nga kini maminaw giingong gi-aksyonan si Bagol sa pagdunggab apan sa unang higayon nakalihay kini.

Apan inay nga mopatuo giatake pag-usab ni Merinello si Bagol hinungdan sa pagkaigo sa tiyan sa maong polis.

Si Bagol daling nakapabuto ngadto kang Merinello diin maayong pagkaigo niini sa iyang kilid ug bukton.

Nakuha sa crime scene ang lima ka kabhang sa kalibre .45 nga gidudahang gikan sa service firearm sa police.

Si Bagol daling milahos sa Cebu City Medical Center apan giingong gibalhin kini sa Chonghua Hospital. Samtang si Merenillo gidala usab sa CCMC ug giingong luwas na human ang mga igo niini pulos ra sa ubos.

Ang amo ni Merenillo nga si Anecita Sinabre mipadayag nga sa wala pa mahitabo ang insidenti iya nang nakit-an si Merenillo nga nagbitbit og kutsilyo ug gani,iya pa kining gipangutana og kun nganong nagbitbit kini og kutsilyo.

Matud pa nga gitubag siya niini nga pang-proteksyon lang tungod kay adunay tawong mopatay kaniya.

Si SPO4 Alex Dacua miingon nga mopasaka sila og kasong direct assault ug frustrated homicide ug possession of bladed weapon batok sa suspek. (/EIM) (BANAT NEWS)