Non-working holiday atol sa ika-44 Charter Day sa Mandaue gitinguha

CEBU, Philippines - Gihangyo sa konseho sa dakbayan sa Mandaue ang Malacañang nga ideklarar ang adlaw nga Biyernes sa Agosto 30 niining tuiga non-working holiday sa dakbayan nunot sa selebrasyon sa ilang ika- 44 ka tuig nga Charter Day.

Ang ilang hangyo ngadto kang Presidente Benigno Aqunio III maoy unod sa giaprobahang resolusyon nga giaprobahan sa konseho.

Sa ilang resolusyon ilang gipasabot nga naandan na nga gihimo sa kagamhanan sa dakbayan ang paghangyo sa pamuno nasud nga ideklarar  nga non- working holiday.

Matud pa sa Konseho nga kun madeklarar kini non-working holiday mahatagan og kahigayonan ang mga Mandauehanon nga makasalmot sa ilang Charter Day celebration.

Si Konsehal Diosdado Suico nga maoy majority floor leader sa konseho sa maong dakbayan nga nahinabi sa Banat News miingon nga gipaagi lamang nila sa paghangyo ang presidente.

Si  Philip Tan, presidente sa Mandaue City Chamber of Commerce and Industry (MCCI), miingon nga  ilang suportahan ang mga kalihokan nga gihan-ay sa kagamhanan sa maong kasaulogan nga molungtad og usa ka bulan nga madungan sa Business Month. (/EIM) (BANAT NEWS)