Dalagita gipusil angol

CEBU, Philippines - Samaron ang  usa  ka  dalagita  human  kini  pusila   sa wala  hiilhing  kriminal samtang  natulog sa sulod sa ilang  balay sa sitio Kilatan, barangay Basak, dakbayan sa Lapulapu  sa miaging kaadlawon.

Ang  biktima  mao si Jessa Quindao, 15, nga nagpuyo sa maong dapit

Si PO2 Jomar Tolentino sa homicide section sa kapolisan sa maong dapit miingon nga nahinanok sa  pagkatulog ang biktima uban sa iyang  pamilya  dihang giluthang  kini.

Dugang pa niya nga si Justin Inot nga natulog usab sa maong balay  maoy nakakita sa  wala hiilhing lalaki nga  namusil. Matud pa ni PO2 Tolentino nga mikaratil  kini og dagan pahilayo human  maigo  ang  biktima.

Pipila ka gutlo  ang milabay  nahigmata  usab  ang  biktima  kay  gibati  kini  og  banhud  sa iyang wala nga  paa diin miagas  usab ang dugo.

Nasuta  nila  nga samad sa bala  ang  nahiagoman  sa  paa sa  biktima.

Gihatud  dayon  kini  sa tagtungod  ngadto   sa Lapulapu City Hospital apan gibalhin  dayon  ngadto  sa Vicente Sotto Memorial Medical Center sa dakbayan sa Sugbo.

Padayon  pang  gibantayan  sa kapolisan  ang  maong  lugar  aron  pagpaniid  sa kriminal.

Wala pa masuta kun  ang  biktima  ba  gyuy  tumong    sa maong  pagpamusil  o  kaha  naalaan  lang  kini.

Kini  tungod   kay  nasuta  nga walay  kontra  ang  biktima.  (/WC) (BANAT NEWS)