Kanhi vice mayor sa Danao dakpunon

CEBU, Philippines - Ang kanhi bise mayor sa syudad sa Danao maoy usa sa 13 ka mga kanhi opisyal sa Development Bank of the Philippines (DBP) ug laing duha ka pribadong individual nga  gipadakop sa Sandiganbayan 3rd Division   tungod  sa  duha ka kuwentada nga kaso  sa pangawkaw  nga  may  labot sa P660 milyones  nga behest loan sa Deltaventures Resources Inc. (DVRI)

Si kanhi Danao City vice mayor Ramon Boboy Durano IV nga sakop sa mga board of directors sa DBP nahilambigit  sa kaso  sa pagtugot  niini  nga  maka-loan ang DVRI nga iya ni Roberto Ongpin.

Ang maong transaksyon nahitabo niadtong tuig 2009   sa panahon sa administrasyon ni kanhi presidente ug karon Pampanga Congresswoman Gloria Macapagal Arroyo.

Ang laing mga opisyal sa nahisgutang bangko nga giisyuhan og arrest warrant mao ang kanhi DBP chairperson Patricia Sto. Tomas, mga kanhi board of directors nga sila si Alexander Magno, Floro Oliveros, Renato Velasco ug Benedicto Ernesto Bitonio Jr.;  Senior assistant vice president Perla Soleta; assistant vice president Teresita Tolentino; branch banking sector manager for Regional Marketing Center (RMC)-Western Luzon Arturo Baliton.

RMC-Metro Manila assistant managers Warren De Guzman, Rodolfo Cerezo ug Marissa Cayetano ug RMC-Western Luzon chief accounts management specialist Nelson Mactlang.

Gawas niini, gimandoan usab nga dakpon ang pribadong defendant nga sila si DVRI president Josephine Manalo ug Golden Media Corp. treasurer Ma. Lourdes Torres.

Ang paghikay sa arrest warrant batok sa nahisgutang mga kanhi opisyal sa DBP gibase sa gipagawas nga unom ka pahinang resulosyon  sa 3rd Division sa Sandiganbayan nga gisuwat ni Associate Justices Jose Hernandez, Samuel Martires ug Maria Cristina Cornejo kinsa mitumbok nga nakakita kini og probable cause para ipadayon ang pagdungog sa maong kaso.(/WC) (BANAT NEWS)