Kapitolyo way ikatabang sa rape victim
CEBU, Philippines - Ang kagamhanan sa lalawigan sa Sugbo walay mahatag nga tabang ngadto sa 21 anyos nga rape victim nga gilugos usab sa nagbantay niining marshal sa Witness Protection Program sa Department of Justice (DOJ) sulod sa 36 ka higayon.
Sumala pa ni Vice Gov. Agnes Magpale, ang pangulo sa Provincial Women's Commission nga dili makatabang ang probinsiya tungod kay dili man kini iya nga hurisdiksyon.
Kini bisan pa man og gusto gyud siya nga ang Provincial Women's Commission motanyag og tabang sa maong biktima sa lugos.
Sumala pa ni Magpale, ang barangay Guadalupe diin nahimutang ang safehouse sa WPP ubos sa hurisdiksyon sa Cebu City Women's Commission samtang ang siyudad sa Lapu-lapu diin nagpuyo ang biktima ubos usab kini sa Lapu-lapu City Women's Commission.
Tungod niini, ang bise gobernador miawhag na lamang ngadto sa biktima sa lugos nga mopadangat sa nahisgutang commission sanglit ang probinsiya walay katungod sa pagtabang niini. (BANAT NEWS)
- Latest
