Ironman Triathlon sa Domingo na

CEBU, Philippines - Plansado na ang pagpahigayon sa 70.3 Ironman Triathlon sud sa Metro Cebu  kauban  sa  mga artista  karong  Agosto 4, 2013 nga  magsugod   sa dakbayan sa Lapulapu.

Matud pa ni Lapulapu City Tourism Officer Hembler Mendoza  nga  mokabat sa 2,150 ka mga  atleta  gikan  sa   35 ka mga nasud ang nagparehistro sa maong paugnat sa kusog.

Miingon  si  Mendoza  nga wala na nila  kini dugangi human  nila  tak-opi   ang rehistrasyon sa mga sumasalmot.

Subay niini gipaniguro  ni Lapulapu City Police Office Director P/SSupt. Rey Lyndon Lawas nga hapsay ang maong kalihukan  tungod  kay mokapin   sa 1,000  ka mga  sakop  sa kapolisan, Philippine  Air Force, Philippine Navy, mga  brgy. tanod  ug uban pang force multiplier sa dakbayan sa Lapulapu nga ipakatap sa maong kalihukan.

Samtang gipasabot ni City Traffic Management System Chief Frank Brazil nga sugdan pagsira ang dalan sa Ironman route   sa alas 4:30 sa kadlawon sa adlaw nga Domingo .

Ablihan  kini  og  balik  iniglusot  na  sa   katapusang   mga  siklista   gikan sa dakbayan sa Mandaue.

Lakip sa gipasidan-an sa   kapolisan   mao ang mga establisemento sa MEPZ 1 ug mga   mga  kompaniya  sa eroplano   aron dili kini matanggong atol sa maong kalihukan.

Gumikan niini mitambag si Brazil  sa katawhan nga mosayo sa pagtabok sa dakbayan  sa Lapulapu o kaha  dili  na lang  sila  moanhi  pa  sa  dakbayan   sa Sugbo kung walay importanteng tuyo.

Samtang 10 ka mga medical station ang ipakatap ni Lapulapu City Health Officer Dr. Rodolfo Berame subay sa rota sa Ironman   nga  langkoban  sa mga doktor ug mga nurse, lakip na ang mga personnel sa Air Force Base hospital.

Ang Ironman Triathlon  ubanan  usab  sa mga artista sama nila ni Apple de ap, Piolo Pascual, Mateo, Kim Atienza, Drew Arellano, Isabel Daza, Thessa Prieto Valdez ug Senator Pia Cayetano. (BANAT NEWS)