Natuel ug Santander gipasidunggan sa konseho

CEBU, Philippines - Gipasidunggan  sa Cebu City Council  si Cebu City Police Office (CCPO) director Mariano Natuel ug si Intelligence Chief Romeo Santander Jr. tungod sa pagkasikop sa giingon nga drug pusher   sa Barangay Sawang Calero nga miresulta usab sa pagkasakmit sa kapin sa usa ka kilo   nga shabu.

Apil nga gipasidunggan uban nila ni Natuel ug Santander mao ang upat ka polis nga sakop sa City Intelligence Branch (CIB) nga nakaapil sa pagdakop ni Roger Flores ug misakmit sa daghang shabu nga mokantidad og P7.8 milyones. Matud ni Natuel ug Santander nga nahinangop kaayo sila nga gi-recognize sa mga magbabalaud sa dakbayan ang ilang kalampusan sa kampanya sa illegal nga drugas dinhi sa dakbayan.

Atol sa sesyon sa konseho sa Konseho sa dakbayan sa Sugbo kagahapon, ang mga konsehal mipasidungog ni Natuel tungod kay bisan og wala siya magustohi sa mayor nga maoy hepe sa CCPO apan daghan kini og maayong binuhatan.

Si Natuel hulipan na sa iyang katungdanan ni S/Supt. Noli Romana ugmang adlawa. Si Romana giawhag sa mga konsehal nga paspasan gayud ang kampanya sa illegal nga sugal nga mikuyanap pag-ayo sa dakbayan.

Gani si Konsehal Ritchie Osmeña, tsirman sa Committee on Public Order and Safety, miawhag sa mga opisyal sa kabarangayan nga moabag sila sa kapolisan aron hingpit nga masumpo ang sindikato sa illegal nga sugal. (BANAT NEWS)