2 ka driver nagsuyop og shabu dakpan
CEBU, Philippines - Nadakpan sa kapolisan sa dakbayan sa Danao ang duha ka drayber sa traysikad nga nagsuyop og shabu didto sa dalan F. Ralota, sa barangay Poblacion sa maong dakbayan sa miaging gabii.
Ang nadakpan mao sila si Dominador Laguna, 27 ug Warlito Barientos Beduya, 37, nga pulos nagpuyo sa maong dapit.
Si PO1 Doniel Capuyan sa maong dakbayan nga nahinabi sa Banat News miingon nga ang duha nadakpan nila ni Inspector Romeo Caacoy.
Kini samtang nagpatrolya ang maong mga polis, ilang nasigpatan ang duha didto sa usa ka hilit nga lugar nga naghithit og shabu.
Dugang pa ni PO1 Capuyan nga nasakmitan og duha ka pakete nga shabu ang maong mga dinakpan gikan sa mga bulsa niini nga ilang girikisa.
Gawas sa shabu nasakmit usab sa kapolisan ang mga kahimanan alang sa pagsimhot niini.
Gibalhog dayon sa bilanggoan ang duha ka dinakpan ug gitakdang pasakaan kini og kaso nga kalapasan sa Republic Act 9165 kon Comprehensive Dangerous Drug Act of 2002. (BANAT NEWS)
- Latest
