Rota sa Iron Man ipaskin sa Metro Cebu

CEBU, Philippines - Makita na sugod karong adlawa sa mga motorista ang mga pahibalo labot sa rota sa Iron Man 70.3 Philippines International Triathlon Competition nga ipahigayun na usab sa Sugbo.

Gipahibawo kagahapon ni Gob. Hilario Davide III nga ang kagamhanan sa lalawigan sa Sugbo ang mobutang sa mga dagkung tarpaulin nga magpahibawo sa mga motorista sa mga apektadong mga dalan atol sa pagpahigayun sa kalihukan karong Agosto 4.

Samtang gipahibawo usab ni Provincial Tourism Officer Grace Paulino nga sayo karong buntag sugdan na nila pagpamutang ang mga pahibalo.

Gawas sa mga tarpaulin, mabasa usab sa mga pamantalaan ang mga pahibalo sa rota.

Sa Domingo, ang tibuok Serging Osmeña Avenue sa may pier area hangtud na sa tunnel lahos sa Cebu South Coastal Road / South Road Properties (CSCR/SRP) sirado sugod sa alas-4 sa buntag hangtud alas 12 sa udto.

Ang mga eskina sa CSCR/SRP Road sirado usab sugod alas 6 hangtud alas 12 sa udto. Ang dalan Cong. A. Bacaltos maoy mahimong agianan padulong sa Tangke, Cansojong, Poblacion ug Dumlog sa dakbayan sa Talisay.

Samtang magpadayon ang kompetisyon, ang mga mobiyahe padulong sa dakbayan sa Mandaue ug sa amihanang bahin sa lalawigan sa Sugbo moagi sa dalan Lopez Jaena ug MC Briones.

Ang mopadulong sa dakbayan sa Lapu-lapu ug Mactan Cebu International Airport moagi sa dalan L. Jaena ug MC Briones liko sa UN Avenue.

Mahimo usab moagi sa dalan SB Cabahug liko sa UN Avenue paingon na sa dakbayan sa Lapulapu.

Ang gikan sa amihanan paingon sa dakbayan sa Sugbo ug Mandaue moagi sa dalan MC Briones ug Lopez Jaena Street.

Samtang atol sa 888 News Forum sa Marco Polo Plaza kagahapon, gipahibawo ni Lapu-lapu City Tourism Officer Hembler Mendoza nga mokabat na sa 50 ka libud-suroy nga iro ang ilang gipanghipos kabahin gihapon sa pagpangandam sa maong kalihukan.

Ila usab giawhag ang mga namuyo daplin sa rota sa Iron Man nga dili itugway ang ilang mga baka ug kanding aron dili makahatag og peligro sa mga moapil sa kompetisyon.

Ang Department of Public Works and Highways ang nitapak na usab sa mga libaong sa kadalanan. (BANAT NEWS)