Alma Moreno mitambong sa oathtaking sa PCL-Cebu

CEBU, Philippines - Misaksi kagahapon ang artista nga si Alma Moreno sa gipahigayong eleksiyon sa Philippine Councilors League Cebu Provincial Federation sa Kapitolyo.

Kauban ni Moreno kinsa maoy PCL national president sila si national chairman Alan Zulueta ug laing artista nga si Maybelyn Rose Fernandez kinsa maoy national secretary-general.

Subling napili si konsehal Carmen Remedios Durano-Meca sa dakbayan sa Danao isip pangulo sa PCL sa lalawigan sa Sugbo ug molingkod sa ikaduhang termino isip sakop sa hunta probinsiyal. Ang pagkapili ni Meca natumong sa ika-35 nga sumad sa iyang adlaw’ng natawhan kagahapon.  “With the help sad sa mga members, sa ilaha sad pagsalig sa maong liderato, mao seguro ning usa ka rason og nganong na unite gyud ang PCL,” matud pang Meca.

Si Meca mibutyag nga naggikan sa lainlaing partido ang iyang grupo nga nagpapili nga miresulta nga walay niatbang kanila. Matud pa ni Meca nga sukad sa una niyang termino sa 2010, gitinguha gyud sa PCL nga walay politika aron mapatunhay ang demokrasya sa grupo.

Tinguha ni Meca nga mapadayun ang mga nasugdang proyekto nga pagtabang sa mga day care centers ug pag-alagad sa 524 ka mga konsehal sa mga syudad ug mga lungsod sa lalawigan sa Sugbo. Si Gob. Hilario Davide III kinsa nipahural sa mga opisyal sa PCL nipasalig nga mohatag og usa ka milyon ka pesos nga pundo.

Laing napili nga opisyal sa PCL mao si Konsehal Eduardo “Digul” Gullas III sa dakbayan sa Talisay isip bise-presidenti, Jeffrey Anthony Yapha sa Pinamungahan isip secretary-general, Gamaliel Lumapas sa Sogod isip treasurer, Irving Gamallo sa Samboan isip auditor, Geronimo Almirante sa dakbayan sa Bogo isip public relations officer ug Julius Alegado sa Consolacion isip business manager.

Ang mga sakop sa hunta direktiba sa PCL mao sila Konsehal Othello Chiong sa dakbayan sa Naga, Emmanuel Jo sa Balamban, Neal Vergara sa Borbon, Erwin Gica sa Dumanjug, Rajiv Enad sa Minglanilla, Samuel Moralde sa Daanbantayan, Nenita Layese sa dakbayan sa Mandaue, ug Napoleon Enrique Teves sa Santander. EIM (BANAT NEWS)