Tulisang armado og toy gun kulatado

CEBU, Philippines -  Duha ka lalaking gipasanginlang tulisan ang gitabangan og kulata sa mga tawo human masayring toy gun lang nga replica sa kalibre .45 pistola ang ilang gigamit sa pagtulis sa usa ka lalaki diha sa dalan Hernan Cortes sa dakbayan sa Mandaue kagahapon sa kadlawon.

Nabun-og na ang kalawasan ug ulo sa mga suspetsadong sila si Ronel Mansuito, 25,  residente sa Brgy. Banilad dakbayan sa Sugbu ug Milan Balili, 23, taga Tawason dakbayan sa Mandaue dihang sila gi-turnover sa mga tawo ngadto sa kapolisan.

Ang duha maoy gitumbok sa biktimang si Dafudel Gordillo, 27, taga Brgy. Basak dakbayan sa Lapulapu nga maoy mitulis kaniya samtang siya nagpaabot og masakyan diha sa maong dapit.

Gumikan sa kahadlok sa biktima iyang nahatag ang bag nga adunay sud nga mga mahalong butang sama sa tablet, cell phone, singko mil pesos  cash ug mga ATM cards dayong sibat sa mga tulisan.

Dihang nadistansya na ang mga tulisan  misinggit ug nagpatabang si Gordillo sa mga estambay ug mga drayber sa taksi hinungdan sa nahitabong ginukdanay ug nabisto nga toy gun diay ang ilang armas.

Tungod niini gitabangan sila og kulata  una pa gihatud ngadto sa Station 4 sa MCPO ug gikatakda karong adlawa nga pasakaan og kaso. EIM (BANAT NEWS)