Kagubot sa parokiya gibantayan sa kapolisan

CEBU, Philippines - Subling gipahugtan sa kapolisan ang siguridad tungod sa gikabalak-an nga subling pag-ulbo sa tension nunot sa nagsingabot nga eleksiyon sa mga parokyano sa San Vicente Ferrer Catholic  Association sa bgy. Pitalo lungsod sa San Fernando karong Agusto  4, 2013.

Ang usa sa mga kandidato sa pagka -presidente sa maong parokya ug incumbent councilor Cary Manlosa nanawagan sa kampo ni Jovy Prosianos nga maoy ikaatbang niya sa umaabot eleksyon nga batunan ang pag-respeto aron malikayan ang dili maayong panghitabo.

Si Manlosa misumbalik og pasangil ngadto kang Prosianos nga maoy naghimo- himo og mao-mao nga eleksyon nga way pagtugot sa  kinabag-an niadtong  Hunyo  16, 2013 ,diin siya ang nangangkon nga midaug sa pagka–presidente.

Apan ambot  kun  unsay  miabot sa  huna-huna  ni Prosianos  nga unta nakahibawo na man kini nga adunay lihitimong eleksyon   niadto  untang   pagka-Hulyo  7, 2013, sumala  pa ni Manlosa.

Hinuon matud ni Manlosa nga nasulbad na nila ang maong isyu  hinungdan  nga  ilang  gisabutan  atubangan ni Cebu Police Provincial Office (CPPO) chief Patrocinio Comendador ang pagpahigayon og laing eleksyon aron mailhan kun  si kinsa gyud ang pilion sa mga parokyano nga lihitimong presidente.

Si Manlosa midugang nga atol sa pipila ka tuig nga pagduma ni Prosianos sa maong parokya wala gyud kini maayong binuhatan tungod kay way nakitang pundo bisan pa og mokita ang San Vicente Ferrer sa mga donasyon niini gikan sa  mga lokal ug langyaw’ng debotos sa P5 milyones  matag tuig. Usa sa gipasangil ni Manlosa nga atol sa pagduma ni Prosianos mismong ang konsumo sa kuryenti sa pinuy-anan niini ang kita sa parokya sa San Vicente Ferrer   maoy   gibayad.

Matud ni Manlosa nga usa kini sa hinungdan nga gi-kudeta si Prosianos niadtong 1998 ug natangtang hinungdan  nga  miasumir sa  pagka- presidente si Calvin Alfeche.

Nunot niini si Manlosa nanawagan sa tanang parokyano pagbotar atol sa eleksyon  karong  Agusto 4, adlaw’ng  Domingo  gikan sa alas 8:00 sa buntag hangtud sa alas 3:00 sa hapon.

Ang parokya ni San Vicente Ferrer  adunay kapin  sa  5 mil ka mga membro. WC (BANAT NEWS)