Anak sa kapitan nakuryentihan

CEBU, Philippines - Maayong pagkasunog sa lawas sa usa ka radio disc jockey nga anak sa barangay kapitan sa usa sa mga barangay didto sa siyudad sa Toledo human kini makuryentihi  diha sa barangay Media Once sa siyudad sa Toledo mga alas 3:00 sa hapon kagahapon.

Ang nakuryentihan patay mao si John Rey Restauro, 21, kamanghuran sa unom ka mga anak ni kapitan Ranec Restauro sa maong barangay.

Si Restauro kanhi disc jockey (DJ) sa gipasirad-an kaniadtong lokal nga radio station sa siyudad sa Toledo nga gipatak-opan sa mayor kaniadto.

Matud ni kapitan Restauro atol sa interview sa DyDD sa wala pa ang hitabo ilang nakit-an ang iyang anak nga nag- checkup sa ilang sound system sa luyong bahin sa ilang pinuy-anan.

Apan samtang nagkutikuti og susi ang iyang anak sa mga gamit sa sound system  kalit lang kining nakuryentihan.

Ang maguwang niini maoy nakakita nga natumba na kini hinungdan nga dali silang nangayo og tabang sa mga silingan ug gihatud dayun sa Toledo City District Hospital kay wala na kini panimuot.

Apan pag-abot sa tambalanan gideklarar sa mga doctor nga Dead on Arrival kon DOA tungod sa grabeng kadaut niini nga nahiaguman og gituohan nga taud taud na kining nakuryentihan apan wala dayun mabantayi.

Si kapitan Restauro mipadayag nga di siya kadawat sa nahitabo sa iyang anak. Iyang gitug-an nga mahiligon gyud og sound system ang iyang anak nga namatay maong kun wala kini lingaw sa ilang balay magkuri-kuri kini sa ilang sound system nga paabangan kun dunay mopakyaw og disco.

Ang pamilyang Restauro mao nay mi-report sa kapulisan kabahin sa maong panghitabo. EIM (BANAT NEWS)